لاہور پولیس اور قانون نافذ کرنے والے اداروں کے اہلکاروں نے پی ایس ایل سیزن 9 کے لیے سیکیورٹی کے فول پروف انتظامات کیے جب کہ بیرون ملک مقیم کھلاڑی پھولوں کے شہر لاہور پہنچنا شروع ہوگئے۔
پی ایس ایل کے دوران 16 ہزار سے زائد پولیس اہلکار سیکیورٹی کے فرائض سرانجام دیں گے، راولپنڈی اور ملتان میں ہونے والے میچز کے لیے سیکیورٹی پلان تیار کر لیا گیا ہے۔
اسلام آباد یونائیٹڈ کے کولن منرو اور ٹیمل ملز لاہور پہنچ گئے جبکہ اسلام آباد یونائیٹڈ اپنی مہم کا آغاز لاہور قلندرز کے خلاف میچ سے کرے گی۔
پاکستان کرکٹ بورڈ (پی سی بی) کے چیئرمین محسن نقوی نے کہا کہ پی ایس ایل سیزن 9 کا ایڈیشن 17 فروری سے شروع ہوگا۔
انہوں نے حکم دیا کہ عوام کی سہولت کے لیے روانی برقرار رکھنے کے لیے موثر انتظام کیا جائے اور کہا کہ ٹریفک کی بندش کا دورانیہ کم سے کم کیا جائے گا، شہریوں کو بروقت میڈیا کے ذریعے متبادل راستوں سے آگاہ کیا جائے گا۔
لاہور ڈی آئی جی آپریشنز پولیس کا کہنا تھا کہ شائقین کرکٹ سمیت کھلاڑیوں کو مکمل سیکیورٹی فراہم کرنے کے لیے سیکیورٹی پلان تیار کیا جائے گا جس میں 7000 سے زائد اہلکار ڈیوٹی سرانجام دیں گے۔
سیکیورٹی پلان کے مطابق 13 ایس پیز، 36 ڈی ایس پیز اور 81 انسپکٹرز تعینات کیے جائیں گے جب کہ پنجاب سیف سٹی اتھارٹیز کے کیمروں سے صورتحال کو مسلسل مانیٹر کیا جائے گا اور شہریوں کو چار درجاتی سیکیورٹی سے گزر کر اندر جانے کی اجازت ہوگی۔
