وزیراعلیٰ پنجاب مریم نواز شریف سے برطانوی ہائی کمشنر جین میریٹ نے برطانوی ہائی کمیشن لاہور آفس کی سربراہ کلارا اسٹرینڈوج کے ہمراہ ملاقات کی۔
ملاقات کے دوران جین میریٹ نے مریم نواز شریف کو پہلی خاتون وزیر اعلیٰ کی حیثیت سے تاریخی تقرری پر مبارکباد دی اور ان کی مدت ملازمت کے لیے نیک خواہشات کا اظہار کیا۔ وزیراعلیٰ نے برطانوی ہائی کمشنر کی نیک خواہشات پر شکریہ ادا کیا۔
برطانوی یونیورسٹیوں میں پنجاب کی طالبات کے لیے وظائف بڑھانے اور لڑکیوں کی تعلیم کو فروغ دینے پر بات چیت ہوئی۔ موسمیاتی تبدیلیوں اور ماحولیاتی آلودگی سے نمٹنے کے لیے ہوا کے معیار کے انڈیکس کی نگرانی کے لیے ٹیکنالوجی کے تبادلے پر بھی تبادلہ خیال کیا گیا۔
مریم نواز شریف نے ڈیجیٹل پنجاب اقدام کو اجاگر کرتے ہوئے گورننس اور شفافیت پر اپنا وژن شیئر کیا۔ برطانوی ہائی کمشنر نے ڈیجیٹل پنجاب وژن کی تعریف کی اور مریم نواز شریف نے پنجاب کو ڈیجیٹلائزیشن کے ذریعے جدید بنانے کے عزم کا اظہار کیا۔
انہوں نے برطانوی اداروں کو آئی ٹی یونیورسٹی کے قیام کے لیے تمام ممکنہ سہولیات کی یقین دہانی کرائی اور پنجاب بالخصوص لاہور میں آئی ٹی پارک کے منصوبے کے بارے میں آگاہ کیا۔ مریم نواز شریف نے کہا کہ آئی ٹی ٹوئن ٹاورز کا منصوبہ بہت جلد لاہور میں شروع کیا جائے گا۔
